Kuv ntseeg tsis tau hais tias hnub no kuv yuav hnov kuv lub siab mob tob tshaj li ib rab riam hno. Kuv ntseeg tsis tau hais tias hnub no kuv txoj kev cia siab yav tag los yuav tsis muaj ntxiv. Vim kuv ruam, los yog kuv vwm, es kuv thiaj li xav hais tias ntshe txhua yam yuav zoo li kuv lub siab ntshaw thiab xav. Qhov kuv hlub nws kuv hlub tas nrho siab ntsws, tuaj puag hauv kuv nruab nrog tuaj. Tab sis ntawm nws, tej zaum nws tsuas hlub tawm ncauj xwb, hauv siab xyov puas muaj.
Luag muaj hmoo es txawm luag hlub tus twg los luag tau lub chaw vam thiab txoj kev hlub raws siab xav. Neeg zoo li yus no, txawm yuav hlub tus twg los yeej tau txais txoj kev lwj siab xwb. Ntshe yuav tau ua ib siab tsis muab lub siab rau leej twg ntxiv lawm os. Thaum ub, kuv yeej xav hais tias kaw lub siab cia, tsis txhob muab coj los rau neeg pov ua si. Tab sis vim kuv ntseeg nws, kuv ntseeg tias nws yog tus txheeb ze kuv, es ntshe nws yuav hlub kuv raws li nws lub siab xav tiag. Kuv thiaj li muab tas kuv lub siab rau nws, vam thiab cia siab tias nws yuav txawv luag lwm leej lwm tus. Tab sis hnub no kuv paub qhov tseeb lawm, txiv neej ces yeej zoo ib yam xwb. Txawm yuav txheeb ze yus thiab tsis ze los yeej coj ib tug xeeb ceem li qub.Yeej tsis muaj tus uas yuav txawv li os. Luag lub siab hlub ces hlub thaum tsis tau tau yus thiab hlub nraum daim tawv xwb. Hauv nruab siab ces ntshe tsuas yog niaj hnub xav tias hlub tus no tas lawm, yuav nrhiav tus tshiab.
Kuv tsis tu siab rau nws. Kuv tsuas tu siab rau kuv hais tias vim li cas kuv yuav ruam ua luaj. Vim li cas kuv thiaj li yuav ntseeg tau hais tias nws thiaj li yuav yog tus hlub kuv tiag. Kuv tu siab rau kuv tus kheej hais tias vim kuv txom nyem ua tsis tau raws li nws lub siab xav thiab nws lub hom phiaj. Kuv tsis tu siab rau qhov nws yuav kam yuav kuv los tsis kam. Qhov kuv tu siab tshaj yog vim kuv muaj ib txoj kev cia siab thiab ib txoj kev vam hais tias kuv yuav ua tau ib qho chaw cia siab rau cov laus thiab cov yau. Tab sis hnub no, kuv paub zoo lawm hais tias ntshe yuav tsis muaj lawm. Txawm kuv xav hlub kuv dab laug thiab niam tais lawv tim nplog npaum li cas los ntshe tsuas yog npau suav lawm xwb os. Zaum no ces nyias yuav mus ua nyias hmoob tiag tiag es yuav tsis tau sib hu sib txib ntxiv lawm os. Txawm yus hlub luag es yus xav pab los ntshe yus yog hmoob lawm xwb es ntshe yuav tsis zoo pab dab tsi lawm. Pab los ntshe yuav tsis muaj txiaj ntsig dab tsi lawm vim tias thaum nyob ua ke twb tsis muaj nqi...puas yog?
Tsis ua li cas os. Hnub no lub siab zoo tsis muaj nuj nqi. Hnub no lub dag zog thiab txoj kev khwv saib tsis raug qhov muag. Twb tau ntev li no lawm, dab laug nkawv yeej tsis hais li cas rau kuv li. Thiab nws los nws yeej tsis hais li cas rau kuv. Kuv hu yeej tsis tau nws. Thaum twg tau ces nws tsuas hais tias nws tsis khoom. Tej zaum yeej muaj tiag mas, tej zaum nws yeej tsis khoom tiag, tab sis tsim nyog nws yuav hais li lo tseeb rau kuv paub. Tej zaum yeej muaj raws li kuv txoj kev xav lawm os. Luag tsis nyiam yus es luag koom siab nrog lwm tus ua rau yus kom yus mob siab es yus tsis txhob tiv tauj luag ntxiv lawm. Txaus lawm os. Kuv mob txaus lawm. Yuav li no xwb, tsis txhob tsim kuv lub siab ntxiv lawm os.
Nyob zoo koj os nawb.
No comments:
Post a Comment