Vim li cas koj siab phem ua luaj. Kuv lam hais dag koj xwb es koj txawm ua tiag tiag lov? Cas koj yuav ua rau kuv mob siab ua luaj li os neeg siab coob es. Txhua zaus kuv tsuas hnov tias yog luag, es zaum no txawm yog kuv lawm tiag tiag lov? Koj puas paub, xyoo no kuv twb ua ib siab lawm hais tias kuv muaj koj lawm ces txawm kuv mus ntsib tus tshiab thiab mus noj peb caug los yeej tsis zoo twg tuaj, es kuv xum mus ua kuv txoj hauj lwm kom tau nyiaj los saib koj. Vim li cas koj tsis xav li kuv xav li os? Vim li cas koj thiaj li tsim kuv lub siab. Cas koj tsis ncaj ncees rau kuv li? Yog koj tsis nyiam tsis hlub ces tsis txhob hais hais lus ntxias dag kuv lub siab vim kuv laj laj ntoog mob li os. Kuv twb hais rau koj tas lwm hais tias kuv tsis xav tau lub neej txom nyem siab ntsws. Yog tias koj xav los ua kom kuv txom nyem siab ntsws xwb ces ua zoo hais es nyias mus nyias zoo dua. Tsis txhob sib sib khuam lawm tsam ntev mus tso tsis tau ces ua lub neej lwj lwj siab es tej laus laj laj nrog yus hais os. Koj puas paub, koj ob tug hluas nkauj ua rau kuv nyuaj siab twb tsis txawj tag, vim li cas koj tseem nrog nkawv ua ntxiv thiab. Twb tsis tau sib sau los ua neej, es lub siab twb mob li no lawm, es lwm hnub tseem yuav mob tshaj no thiab lov?
Kuv yim xav, kuv yim tsis xav los. Xyov puas yuav tsim nyog kuv coj kuv lub siab los rau koj. Tsam kuv coj los txog koj muab rhuav xwb es koj tsis kho, thaum ntawv ntshe kuv yuav tsis xav ua neeg nyob li lawm os. Qhia koj paub, yog kuv tsis hlub koj ces kuv yeej tsis xum tuav plig ntsoov los saib koj thiab yeej tsis xum yuav pib dav hlau li na. Ib sim neej no, kuv yeej tsis tau nrug kuv tsev neeg yuav mus ib qho kev deb qhov twg, kuv yeej ib txwm tsis tau caij nyooj hoom dua, es koj puas paub hais tias kuv tswj kuv lub siab tawv qhawv los saib koj yog vim li cas? Vim kuv hlub koj. Vim kuv yog ib tug neeg vwm, los xyov yog kuv ruam es kuv thiaj li yuav ua li no.
Kuv tu siab heev uas kuv ua tsis tau raws li kuv lub siab xav vim kuv txoj hmoo phem, vim kuv tsis muaj li luag, nyob ua ib tug neeg txom nyem siab ntsws heev, xyov siab ntsws puas muaj lawm thiab os. Kuv muab txhua tsav yam hauv kuv lub neej xav tas lawm. Kuv tsis xav ntsib kev nyuaj siab, kev quaj ntsuag ntxiv lawm os. Kuv tsis xav tau lub neej nyob quaj pos muag nti es ib puas tsav yam los yuav yog kuv yog tus los ua. Kuv xav tau ib tug los pab kuv, los nrog kuv tham thiab los txhawb kuv thaum kuv muaj txoj kev nyuaj siab. Kuv tsis ntshaw kom nws muaj kev txawj ntse, kuv tsis ntshaw kom nws muaj nyiaj muaj txiaj, kuv tsis ntshaw kom nws muaj thiab paub ib puas tsav yam. Qhov kuv ntshaw yog nws lub siab zoo, thiab nws txoj kev hlub. Kuv ntshaw ib tug los hlub kuv thiab kuv tsev neeg ua txoj kev cia siab rau yav tom ntej vim peb txom nyem txaus lawm os. Kuv tau vam thiab tau cia siab hais tias tej zaum nws yuav yog koj vim koj yog tus txheeb tus ze, tab sis tej zaum kuv xav yuav kev lawm pob, puas yog? Ntshe tus txheeb ze yus yuav yog tus uas ua rab riam los hno yus kom tob thiab mob tshaj. Ntshe nws yuav yog lub tshuaj lom uas iab tshaj plaws los rau yus nqos vim hais tias thaum tus nyob hauv tsev twb tsis xav hlub yus lawm, es tus sab nrauv puas yuav xav hlub yus os?
No comments:
Post a Comment