Vim li cas tus mob thaum kawg ho yog kuv? Vim li cas txhua zaus kuv rov qab hais rau kuv tus kheej tias kuv yuav tsum ua siab ntev thiab yuav tsum siab loj? Es yog koj dag xwb los koj hais tiag os? Hauv koj lub siab muaj pes tsawg leej? Koj lub hom phiaj puas yog lam sim seb tuam puas tau choj hla dej hiav txwv xwb os? Thaum tuam tau npaj yuav hla ces ho nrhiav tau pov haum nyiaj pov haum kub rov rau sab tim ko lawm es yuav tsis hla puas yog?Yog koj tsis muaj siab tiag ces tsis txhob dag vim kuv los kuj yog tib neeg, kuj muaj siab ntsws ib yam thiab os. Kuv yeej paub tias ua tib neeg nyob yuav tsum muaj phooj ywg txhawb nqa yus lub zog es yus thiaj muaj siab ua dej num thiab, tab sis kuv xav mas tej zaum neb tsis yog vim kuv saib zoo li koj ib nplooj siab twb muaj nws nrog koj nyob lawm os.
Yog kuv ua li rau koj ne, koj puas xav li kuv xav thiab os? Los yog koj yuav ua siab loj siab dav es hauv siab yuav tsis nroo tsis hais, tsis hnov mob os lov? Twb tsis tau sau los ua ib yig, es lub siab twb mob npaum no lawm, es thaum los ua ib cuab ib yig lawm es yuav zoo los yuav phem os? Vim tias nej cov txiv neej muaj hwj chim dua peb cov poj niam, nej yuav ua raws li nej siab nyiam los yeej tau. Ho hais txog ntawm peb ces txawm mob siab tshuav tuag los tsis zoo hais li lo rau leej twg paub li os.